夫死夫還在 禾蟲過造恨唔返
有老友租用舖位的業主因為等錢用，以低於市價叫價，希望老友可以買下租用的舖位，但老友一家將會去旅行，回覆業主話待他們回港之後再考慮，老友業主於是問我有冇興趣，老實說，我覺得雖然未致於是一個荀盤，但價錢不貴，而且老友做得唔錯，交租準時，買入亦是一個好投資，不過，有機會與老友反目，倒不如問一問老友有冇興趣，冇興趣我再考慮。
我知道老友是有興趣，不過要同老婆去旅行，待他們回來之後再買，我於是請老友兩公婆食飯，並且叫人從澳門帶了一底禾蟲給我，在席間，我同老友講，禾蟲是很短造，相傳有一個剛剛死了老公的新寡文君，在守夜當夜，聽到有小販叫賣禾蟲，竟然買禾蟲做宵夜，有人話佢不守婦道，新寡文君話，夫死夫還在，禾蟲過造恨唔返，佢老公條屍唔會唔見咗，今晚唔食禾蟲，可能要等明年才有得食。
現在有不少業主因為等錢用，而要將手上部份舖位賣走，只要能夠賣走一兩個，便可以解決問題，其他可以不賣，所以，老友的業主只要賣走其他部分舖位，就唔會賣老友租用舖位俾佢，於是同老友講，旅行幾時都可以去，就算今次臨急臨忙取消，最多只是損失一些手續費，隨時可以再去旅行．但如果唔買下租用舖位，可能一世都買唔到，夫死夫還在，禾蟲過造恨唔返。
| 各區最新放盤應有盡有 |
