點解租金與樓價會分道揚鑣
有一個話一世租樓，唔會買樓的老友話，最近樓市好唔妥，在過去六個月樓價下跌令到佢非常開心，但到續租約時，業主竟然加租，佢條氣當然唔順，但業主話已經好有人情味，好多業主都唔想租俾咁大年紀租客，就算租都要高過市值租金，叫老友留意下租務市場，在過去六個月，租金上升不少，而且仲沒有停止停止跡象，老友話世界是否變了，樓價下跌，租金反而上升。
老友唔打算買樓，所以唔知道樓價與租金關係，一般來說，樓價上升租金亦會上升，不過，當中亦有例外，一個動盪，但又好容易搵錢地方，不但外來人，就算本地人都唔會買樓投資，樓價很難上升，但樓宇需求龐大，租金反而會上升，有人叫這是世紀末效應，就好似解放前胡志明市，當時叫西貢，樓價好平，租金好貴，回報相當高，有不少香港人中伏，包括粵劇紅伶新馬師曾，不過，正是世事如棋局局新，不能一本通書睇到老，香港現在情況又唔同。
大家都知道，香港有壓抑樓價辣招，香港人買第二個單位要付15 ％特別印花稅，外地人則要付30 ％，即使是專才，都要先付，七年後才退回，在這個情況下，只有那些沒有住宅單位的香港人才可以買樓而不用繳付特別印花稅，如此單薄購買力又如何支撐樓市，與此同時，英國大開中門，無條件讓BNOer移居英國，大大話話有30多萬人離開，當中有不少是有自住單位，雖然那些離開香港的人未必會賣走他們的住宅物業，但或多或少總有人會賣樓，在單薄的購買力之下，樓價又怎能不跌。
至於租金上升理由也是因為有壓抑樓市辣招，由於外來專才或者來港讀書的內地人，他們唔想繳付咁大筆印花稅，最好辦法就是租樓，令到市場上購買力雖然疲弱，但租務市場澎湃，令到租金不斷上升，而且由於香港人買第二個住宅單位要付15%印花稅，基本上冇人買樓收租，如果市場上的出租單位賣走，買家大多數會自住，便會少一個單位出租，在需求增加，供應減少情況下，租金上升是極之正常，千祈唔好以為香港進入世紀末效應，冇人願意買樓，寧願付多付租金租樓。
| 各區最新放盤應有盡有 |
