睇世界盃都要TECH！手機AR程式即場睇踢波數據
四年一次嘅世界盃就快開波啦，除咗睇波，今屆卡塔爾、國際足協以及香港電視台，都引入咗好有睇頭嘅新科技！最正嘅梗係手機AR程式，俾球迷即刻睇到每個落場球員數據，自己都變講波專家，另外，仲有AI半自動分析有冇越位、識得幫球迷同球員降溫嘅場館、同埋外賣app將飲品食物送到球迷座位等，嘩，原來睇波都可以咁高科技。
1. 手機程式透過AR睇球員即時數據
一般人睇波剩係關心比數，但Fans除咗輸贏，仲想知愛隊踢成點，邊個球員最勤力、邊個浪費晒入波機會，咁樣先可以一路睇波一路同其他Fans講波經嘛！呢啲數據要去專業嘅足球網站先搵到，仲隨時要收錢，但而家用手機對住任何平面，就俾你睇晒落場球員嘅數據喇，超方便！
今屆有得播世界盃嘅Now TV，整咗一個支援AR嘅手機程式「Now AR – FIFA 世界盃」，你只需開啟程式之後揀賽事，再將手機鏡頭對住任何平面（例如牆身、枱面），手機個mon就會出現一個立體的球場，然後你點擊球員，就睇到佢哋喺呢場波嘅數據，例如跑動速度、跑動距離、傳球成功率等，亦可以宏觀咁睇番兩隊嘅表現，例如戰術調整、球隊陣式，用戶仲可以跟虛擬球員嚟一個合照。不過小編就試唔到呢個AR程式，一來佢只限睇到世界盃嘅Now客戶使用，而且開波前「csl 5G Lens」應用程式才提供連結，俾用戶下載及開啟「Now AR – FIFA 世界盃」，到時先知道實際效果係點。
2. SAOT即時自動分析有冇越位
而家大型嘅足球聯賽、重要盃賽都有VAR (影像輔助裁判)，幫手睇有冇手球、越位、入球前有冇球員犯規等等，雖然偶有爭議但無可否認減低咗誤判嘅機會。不過VAR係靠好多部球場入面攝影機，然後用唔同角度、慢鏡頭睇番球員做過乜，但對於球員有冇越位就未必睇得準，因為越位果條線究竟由邊個角度去畫，出黎嘅結果都好唔同。
為咗更加公平，其實今屆歐聯已經採用新技術去睇球員有冇越位，名為「半自動越位科技（semi-automated offside technology）」，卡塔爾世界盃都會用佢。根據國際足協，呢套系統嘅運作原理係咁嘅：用兩個測量方法，第一個亦係最主要嘅，係透過放響球場天花嘅12部追蹤攝影機，靠佢哋去檢查放喺個波，同球員身上嘅29個偵測點，呢啲點就放喺球員有機會構成越位判決嘅部位。攝影機每秒收集50次數據，並計算個波同埋每個球員所在位置。第二個方法係個波裡面有一個感應器，用嚟測量「慣性測量單元」（IMU），能有效感應非常唔明顯嘅越位。呢個感應器每秒會傳送500次數據到VAR室，用嚟精準地計出傳球嘅一刻。將呢兩個數據拍埋：即係知道球員位置、個波傳咗未，人工智能就會計到某個傳球有冇越位，仲會自動劃埋越位條線以及罰球點，反應時間亦會由70秒減少到25 秒，之後VAR球證會檢查一次，再將結果通知主裁判。由於劃線係由同一個系統去劃，令到判決更加公平，相信可以減低因為VAR判決嘅爭拗。
3. 球場識得幫球迷同球員散熱
今屆世界盃主辦國係卡塔爾，佢嘅11月平均氣候介乎20至30℃，而小組賽開波時間係當地下午1點、4點、晚上7點同10點，如果要接近30℃睇波甚至踢波，都咪話唔辛苦啊！於是卡塔爾用嚟踢世界盃嘅球場，都係精心設計，當太陽喺卡塔爾天空移動，球場同看台仍能有相當大部分面積保持陰涼；其次係球館主色用淺色，冇咁吸熱，然後係外型，可以反射熱力，並引導空氣喺天井開口之上同周邊流過。最後就係用冷氣！吓？室外開冷氣咪好嘥電？係唔會嘅，等小編用其中一個球場：Al Janoub Stadium做例子。
首先看台嘅座位下邊，有一排通風口輸出涼意，佢作用好似沖涼嘅花灑，不過唔係噴水而係噴空氣，令觀眾感受到流動嘅氣流，感覺就似有風不斷吹過咁樣。同埋佢吹出嚟嘅風係溫和嘅，唔會好似室內冷氣機咁樣，對住你個頭不斷噴冷氣，令觀眾好唔舒服。其次，球場內有大型噴嘴，向場內噴射冷空氣，喺草坪上形成一個涼空氣層，而唔係單純咁將冷空氣噴射入室內。呢個涼空氣層離地唔超過兩米，溫度將介乎18至24℃。幫助開發呢個系統嘅空氣調節專家表示，通風嘅角度，以及冷空氣下沉嘅位置、方式，會令到球員感覺到涼風。當涼快嘅空氣重新熱起來之後，就會喺中層區域被抽氣扇抽走，然後呢啲空氣會被過濾，重新冷卻，再被抽送回場內，完成循環。而供電嘅發電廠，係用太陽能發電，所以都算非常環保。
4. 用app叫嘢食仲送到埋座位
卡塔爾有一個外賣App叫Asapp，擁有超過60家餐廳及咖啡廳，並且喺卡塔爾大多數體育賽事中都有供應飲品或食品，顧客用佢叫嘢食，等一陣就會有人送餐到顧客既座位，咁顧客就唔駛因為等攞食物而錯過咗球賽，又慳番排隊時間，小編覺得呢個服務非常貼心。點解香港大球場唔學吓呢？咁咪唔駛所有球迷都等半場時間一齊湧去買嘢食囉！
