「追星」新手必睇 手機都影到靚星河
冬季正係觀星嘅好季節。雖然香港好都市化，原來都可以睇到好靚嘅星雲，嚟緊仲會有兩場流星雨，想做「追星族」，就要留意以下睇星日子，同埋準備一部手機，就可以影到靚星河。
兩大流星雨「襲港」
「追星族」要注意嘞：
繼11月8日，香港出現血月天文現象，在11月19日凌晨會出現獅子座流星雨的高峰期之後，本年獅子座流星雨的活躍期為11月6日至11月30日，天頂每小時的流星數目約10顆，小編建議嘅觀賞時段喺11月19日午夜12時至凌晨2時。
而獅子座流星雨只係前奏，更大嘅流星雨，雙子座流星雨會喺12月14日夜晚9點進入高峰期，天頂每小時嘅流星數目為150顆，小編建議嘅觀賞時段為12月14日晚上7點半至11點。
至於用乜嘢器材才可以清晰欣賞流星雨？我哋訪問左著名天文攝影師不動明王Vincent Cheng，佢介紹話，睇流星雨唔使特別嘅器材，只要搵一個天空夠黑無乜光污染嘅地方，計啱時間，抬頭就望到。如果要影到流星雨，只要你用任何能做長時間曝光嘅相機，加一支穩陣嘅三腳架，將焦距定喺無限遠，扭細一啲光圈，就可以捕捉得到。佢又補充，而家好多有長時間曝光嘅手機（咁即係iPhone無份？）都可以影到星星㗎。
雙子座流星雨：只要用手機加一啲簡單嘅攝影技巧就拍到流星雨。（攝影：不動明王）
雙子座流星雨：資深的攝星人如不動明王，不但捕捉到流星雨，更能將銀河同星雲拍入相中。（攝影：不動明王）
香港著名天文攝影師，不動明王Vincent Cheng
初哥學影銀河相 屬初級難度
Vincent仲教小編，除咗流星雨，原來適合嘅手機（咁又係講有長時間曝光嘅機），只要穩定喺三腳架上，試多幾次（如果識用PS拼相就更好）就影到好有感覺嘅銀河相。
Vincent就示範咗一張用ASUS Zenfone 7 PRO同一張用Panasonic CM1影嘅銀河相。兩張都係喺Vincent嘅天文攝影基地拍攝。
Vincent講，用手機拍銀河只係天文攝影嘅初級難度，仲提供咗以下嘅貼士：
1. 如果係多鏡頭手機，最好用主鏡頭拍攝。
2.一定要有支穩固嘅腳架。
3.快門設定喺25-30秒
4.固定ISO值，可以試用唔同嘅ISO拍，再睇效果，理論上ISO愈低，噪點愈小，但曝光時間愈長。
5.手動對焦至無限遠 （所以手機有手動對焦模式就最Good。）
6. 用RAW檔案格式，方便做後期製作。
7. 色溫建議調到2700k，當然亦要視乎你鐘意嘅色調風格。
8. Set定時拍照，例如設定2秒後開快門，咁就可以減低按快門嗰下震到部機。
Vincent提醒初哥，攝影都係靠工多藝熟，只要試多幾次就搵到自己嘅方法。熟練後就可以調教前景構圖。
手機都可以拍銀河，用一部ASUS Zenfone 7 PRO便能拍出這樣的效果了。（攝影：不動明王）
不動明王認為用一部專門拍攝用嘅手機，拍出來嘅效果會更接近用專業相機拍出嘅效果。（攝影：不動明王，器材使用：Panasonic CM1）
城市都可以拍到星星
Vincent亦示範咗係沙田第一城，都可以拍攝到銀河。但佢話市區光害嚴重，只能夠影月亮或行星。不過，如果加上光害濾鏡同特別嘅拍攝方法，市區連銀河也可以拍攝得到。（但呢個唔係初哥級別了）
如果真係迷上影星，Vincent就介紹最適合初哥去影嘅兩個地方：大嶼山南部、大美督水壩。
當大家都經過初哥階段，想好似Vincent咁做攝星達人，就要添置好多專業器材，呢個就係後話，Vincent話，影出深空嘅星雲未必一定要去到天涯海角，就喺新界上水都可以影出精彩。
大美督主壩拍出來的銀河效果。（攝影：不動明王）
大嶼山昂平拍出來的銀河。（攝影：不動明王）
當你迷上天文攝影，便要買一大堆專業器材，去捕捉深空中的星雲，這都是不動明王於上水的基地拍出來的專業級星雲圖。（攝影：不動明王）
當你迷上天文攝影，便要買一大堆專業器材，去捕捉深空中的星雲，這都是不動明王於上水的基地拍出來的專業級星雲圖。（攝影：不動明王）
