摺疊式便攜獨木舟

想一個人泛舟湖上，但艇從何來？摺疊式獨木舟幫到你！摺疊式獨木舟輕身又容易組裝，一般只需約 3 至 5 分鐘就可以組裝完成，簡單易用，適合所有玩家使用。而且獨木舟摺疊後亦只佔極少收納空間，啱晒窩居香港人隨時出海。

電動滑浪板

傳統滑水需要快艇拖行協助，不過近年市面出咗好多電動滑浪板，靠滑浪板自己嘅引擎推動，唔需要借助外力，咁就幾時想滑水都無問題！電動滑浪板有早年常見嘅噴射滑浪 (JetSurf) ，靠手柄啟動滑浪板、油門加速，時速最快可以去到 55km/h ，最長使用時間達 3 小時。

而 eFoil 電動飛翼板，則係近年較熱門嘅電動滑浪板。電動飛翼板板尾底部配備電動摩打，再由導管式螺旋槳推動，時速最高 40km/h。玩家可以透過藍芽遙控手掣操控方向同速度，亦可以利用手掣上嘅顯示屏幕查看航行速度同電量。 eFoil 可以連續滑行約 1 小時，充電時間則為 2.5 小時。電動飛翼板由碳纖維所製造，重量只有 13.5 公斤，相當輕盈。

電動滑浪板雖然刺激好玩，但原來佢哋同電動單車一樣，都係要拎牌，否則屬於違法，所以大家玩水上活動，記得要留意返！

 

站立式滑浪板

玩電動板要拎牌，咁唔想咁麻煩但但又想享受滑浪嘅樂趣，可以點算呢？有美國水上活動用品品牌就出咗款站立式腳踏滑浪板 (Stand Up Pedal Board)，等啲無滑浪經驗嘅朋友都可以輕易上手，享受「水上飄」嘅樂趣。比起滑浪板，呢塊站立式滑浪板其實更似一架單車，推動原理係同踩單車差唔多，不斷踩踏板上的腳踏，就可以推動滑浪板前進，非常易玩。

 

風翼衝浪

風翼衝浪 (Wingfoil) 係近年好流行嘅其中一種水上活動，用風翼同水翼滑浪板嚟滑浪。風翼同滑浪板唔相連，玩家需要將雙腳固定企喺滑浪板上，並且用雙手控制吹氣風翼，借助風力喺水面上滑行。

水下推進器

喜歡潛水嘅朋友，當然少了不配備返部水下推進器，享受水下探索嘅樂趣。水下推進器速度可達到 1.8m/s ，持續長達 60 分鐘。想拍攝水底美景，推進器上有支架可以固定智能手機或運動相機，無需額外花費，就可以兼具拍攝功能。

香港熱門玩水推介

生活喺香港，最幸福嘅其中一件事，就係隨時都可以見到大海，幾時想玩水都無問題！香港沿海岸有唔少活動中心，提供各式各樣水上活動，真係幾時想玩，都可以話走就走！

Tech實你 水上活動 滑浪 衝浪 獨木舟