5大裝修中伏位 廚房廁所漏水問題多多點避免？
近年好多媒體都報道過由於裝修不當，導致廚房、廁所漏水水浸，甚至影響樓下被投訴等問題，消委會亦收到唔少有關裝修嘅投訴，包括貨不對版、施工馬虎等等，花咗大筆金錢最後裝修質素都係未如理想，確實好頭痛。向投訴消委會之前，不如先注意以下五大裝修中伏位，盡量避免喺裝修工程完結後嘅爭議。
裝修中伏1：廁所防水問題多
新屋裝修最多問題嘅一定係廁所，好多水喉漏水等問題係喺廁所或者浴室出現，嚴重嘅話更會波及樓下。因為防水工程涉及嘅工序非常繁複，好多不良嘅裝修公司都會想盡辦法偷工減料，佢地好多時都唔跟足標準施工，甚至唔做浴室地台同埋牆身防水，以節省成本同埋工時，因為防水層係最貴，成本最高，好多時如果你冇要求，師傅就唔會特別整，最後引致一系列嘅漏水、滲漏問題。
建議：裝修時，先檢查有冇漏水，同埋要更換單位來去水喉，咁就要同裝修公司傾好相關工程嘅處理方法同收費，例如喉管同安裝配件嘅材料費用，列明喉管設計等等。
裝修中伏2：廚房最怕裝置亂咁裝
對於鍾意下廚嘅業主嚟講，廚房十分重要，廚房有唔少嘅裝置，例如鋅盆、廚櫃、洗衣機電掣/去水位等等。呢個時候選擇一個能總觀全局、有豐富經驗嘅裝修師傅就相當重要。因為廚房係一個功能性相當多嘅地方，每項裝置嘅擺放位置都會直接影響廚房嘅使用，聽講過有個裝修師傅將吊櫃裝喺抽油煙機正上方，鋅盆嘅附近嘅防水層又做得唔好，去水位接駁又馬虎，令到屋主廚房水浸。
建議：一定要叫裝修師傅/公司先畫草圖，考慮位置擺放係咪合理，裝修廚房最好預留多幾個電掣位。完成裝修之後要特別檢查鋅盆，電掣位及去水位係咪正常運作，有冇滲漏問題等。
裝修中伏3：牆身及油漆最怕偷工
牆身及油漆範疇都係比較多裝修中伏嘅地方，一啲裝修工程中會翻新牆身，一般而言都會包括鏟底、批灰及上新油漆等工序，有啲無良裝修公司為咗慳人工、時間同埋用料，有時會冇跟足工序，好多時髹油無做「剷底」同埋「批盪」，會令油漆好快就剝落。
如果裝修工人手工差，最常見嘅有地板、地磚出現裂痕、高低不平。所以大家喺裝修完成之後記得要檢查呢啲地方。
建議：大家都可以草擬裝修合約時寫清楚油漆品質同數量、顏色、品牌等，時間許可嘅話，翻新牆身嘅工程都建議每個工序都監工。
裝修中伏4：傢俬最忌唔啱Size又裝唔穩
講起裝修當然唔少得傢俬方面，最常見嘅中伏位係，如果要裝修公司訂購傢俬，最忌佢哋用料馬虎參差，將平價、舊貨當新貨用。
如果係度身訂造傢俬嘅話，有啲裝修師傅喺設計擺放位置都令屋主十分頭痕，例如求其度尺寸、空間預唔準、又無預電掣擺放位等等，試過有Case 係搞到要喺衣櫃開個窿先用到電掣，相當唔方便亦唔美觀。最怕就係手工馬虎，不美觀算小事，嚴重嘅可能會有生命危險，例如吊櫃求其裝上去就算，少咗粒螺絲都唔知、碌架床圍欄裝得太短或裝唔穩等等。
建議：裝修前先將家居尺寸量度好(記得避開電掣擺放)，然後Send俾你嘅裝修師傅，等好草擬相關嘅設計圖，然後再三檢查同埋確認尺寸。當傢俬裝咗落去之後，要檢查清楚是否穩固，特別係螺絲位有冇裝好。
裝修中伏5：電掣數目報多咗
電掣項目都係最常見嘅裝修工程中伏陷阱，有啲裝修師傅為咗賺多啲，無根據當初協議，自行改動或加裝額外電掣位，最終令賬單較預算高出數倍。亦有啲裝修公司同客人傾裝修設計時，遊說客人記得預留多幾個插座，避免之後唔夠用，搞到成屋都係拖板。呢啲濫裝電掣係無良裝修公司最常見嘅招數。
建議：了解同記低自己需要用電掣嘅地方同數目，比預計嘅預留多1-2個就夠，唔需要預留太多。訂立裝修合約嘅時候要寫清楚數目同收費，如果需要加電掣數量就先要求更改合約才動工，屋主亦要多啲親自跟進施工進度，必要時影相作為證據，完工後都要數清楚電掣數量係咪合約所寫。
