【湯文亮專欄】如果現在買樓 最好買摸貨
有老友話從比特幣賺了多少錢，現在返璞歸真，想買物業收租。老友投資比特幣獲利，可以賺到夠錢買樓，是我認識的第一人，既然那些錢是從虛擬世界賺回來，不是分甘同味，而是分金同享。現在買樓有一個很大膽做法，唔好同業主買，而是同炒家買，接炒家的摸貨。
老友摸不著頭腦，我話老實說，現在已經過了買樓的最佳時機，同業主買並不一定可以買到優質物業，不如同炒家買。炒家那些貨是幾個月前買落，有一個較長的成交期，物業質素會比現在出售的為佳，而且價錢會平過現價。炒家當然要賺錢，不過除笨有精，就算俾錢炒家賺，仍然有很大機會低過市價，但質素一定會不錯，而且主動權在買家手裡。如果唔啱價或者物業質素唔好，買家是可以唔買，這個世界「有強姦冇焗賭」。
老友話抗拒摸貨，因為這樣做會助長炒風，我唔怪老友，因為有很多人都有這種想法。其實，可以從另外一個角度去睇，炒家其實是一個零售商，他們從批發商買了一大堆貨物，在市場分銷，只是賺大約10%，而且有一定風險。如果冇人買代表是次貨，隨時要自己上身，買家可以慢慢睇，慢慢揀，揀到啱先還價。而且物業代理是會很落力玉成其事，因為可以收多一份佣金，這是物業投資的高深學問，一般人是不會講，老友始終話俾錢炒家賺，過唔到自己那一關，反問我是不是要出貨，所以叫人同炒家買樓，我無話可說。
作者為紀惠集團行政總裁湯文亮
