【装修设计】盘点网民6个最后悔设计，唔想住落先呻「早知」就必睇！

日期：2026-03-27

花咗几十万甚至上百万装修，满心欢喜准备迎接理想新居，点知住落先发现处处「唔顺手」？最近网上掀起热烈讨论，唔少网民纷纷大呻「早知装修嗰时就⋯⋯」，列出自己屋企嘅「后悔设计」。装修佬就综合咗近年网民盘点出最常见嘅后悔设计，装修前记得睇清楚，唔好畀自己后悔嘅机会！

第一位：电掣位规划大失预算

呢个问题可以话系「后悔榜」上嘅冠军常客，几乎系所有过来人嘅共同痛点。最常见嘅问题就系「数量唔够」，当初以为「预到啱啱好」，点知入住后吸尘机、风筒、手机充电、各种小家电全部都要争插苏用，搞到全屋都系拖板，既唔美观又有安全隐患。其次系「位置出错」，例如床头冇开关掣，冬天要离开温暖嘅被窝熄灯，绝对系「每日最后悔嘅事」；或者梳化、餐枱附近冇插苏位，想边食饭边打边炉、边睇电视边用电脑都变得非常唔方便。最后，就系忽略咗新科技，好多人后悔冇直接安装带有USB或Type-C嘅插座，悭返个充电插头。

第二位：开放式厨房 – 理想与油烟的距离

开放式厨房加个中岛吧台，睇落既时尚空间感又大，系好多人嘅梦想。但对於经常煮食，特别系锺意中式爆炒嘅家庭嚟讲，呢个可能系恶梦嘅开始。无论抽油烟机有几强力，油烟同食物气味都好难避免会飘散到全屋，梳化、窗帘、甚至挂起嘅衫都会「吸收」晒啲味。另外，如果单位唔够大，中岛吧台有时反而会阻碍走动路线，最后变成堆放杂物嘅地方，失去原有嘅功能。

第三位：收纳柜的两难－愈多愈好？

为咗增加储物空间，好多人会选择订造大量组合柜或系统柜，务求用尽每寸空间。但唔少网民分享，入住后先发现根本用唔到咁多柜，过多嘅大型柜体反而令空间变得压迫，感觉好似住喺个「积木盒」入面，影响居住心情。想当初花钱订造，如今却变成空间嘅负累，确实令人后悔。

第四位：全屋灯光设计过於单一

好多户主装修时对灯光嘅要求只有「够光猛」，於是全屋统一用白光灯；或者追求温馨感，全屋只用黄光灯。结果住落先发现，全屋黄灯令人昏昏欲睡，想喺屋企工作、睇书时精神难以集中；而全白光又会缺少温馨舒适嘅感觉。同样，「间接照明」或假天花灯槽亦榜上有名，虽然初头睇落好有气氛，但好快就会变成积尘、藏匿昆虫嘅温床，清洁极之困难，久而久之就索性唔再开。

第五位：浴室设计忽略细节

浴室系每日都会用到嘅地方，细节上嘅失误会带嚟长期嘅不便。最多人后悔嘅就系「冇做乾湿分离」，导致每次冲完凉成个厕所地下都湿晒，唔单止增加滑倒嘅风险，亦令浴室长期处於潮湿状态，容易滋生霉菌。另一个常见嘅疏忽就系冇拣防滑地砖，特别系屋企有长者或小朋友，湿水后嘅磁砖表面极易滑倒，后加防滑垫又容易藏污纳垢，清洁起上嚟非常麻烦。

第六位：开放式衣柜 – IG靓相与现实的落差

社交平台同杂志上嘅开放式衣帽间睇落非常有型，将衣物饰品展示出嚟，好似时装店一样。但现实系，除非你系收纳达人兼且非常勤力，否则呢种设计好快就会变成凌乱嘅根源。衣物颜色、款式唔一致，挂出嚟只会显得杂乱无章；而且香港天气潮湿，尘埃较多，开放式设计令衣物非常容易积尘，需要花费大量时间心力打理，最后只会后悔当初点解唔装返道门。