我地要享受快充技術，先要了解一下，目前手機市場上快充技術有兩大陣營：高通 Qualcomm Quick Charge (QC)、USB-PD (USB Power Delivery)。
為高通旗下 Quick Charge技術，最新版本已去到QC 4+，QC 4+除了延續 QC4.0 嘅充電 5 分鐘使用 5 個鐘、15 分鐘充電達 50%、並支援 USB-PD 標準等優點外，還增強雙重充電（Dual Charge）技術、智慧溫控系統及充電安全性，令QC 4+嘅充電速度比 QC4.0 快 15%，相較起宜家較常見嘅 QC3.0，可提升 38% 嘅充電速度，並且最大充電瓦數可達 27W。
USB PD係由 USB 開發者論壇所定義嘅供電技術。目前可支援嘅裝置好多、連 iPhone、iPad 也都支援USB-PD快充，USB PD快充主要可分為 10W、18W、36W、60W 與 100W 五種功率規格，電壓採用 5V、9V、12V、20V，最高可與 5A 電流嘅Type-C 接頭使用。充電中裝置同充電器之間會自動判斷應該用幾大嘅電流充電。USB PD快充同時可相容於高通最新嘅 QC 4.0、QC 4+ 快充技術，大家睇睇呢個表就明：
要得到快充效果，我地首先要選購一個對應快充技術嘅充電器，而家嘅PD標準，最高輸出功率為100W，但輸出功率愈大，價錢同體積都會愈大。我地應要買幾多W嘅充電器至夠用呢？
如果，你只需要為一部手機充電，我哋只要選擇18W～30W就相當夠用了。多咗嘅功率唔會令手機充得快啲，只會浪費買充電器嘅錢。因為大部分手機只需要18W左右就可以快充。
但如果你買一個快速充電器，同時要充埋平板同手提電腦，又同時會充多個一部手機或尿袋，咁你要買輸出功率至少65W至夠用。以MacBook為例，佢係以65W為標準，你就要買一個65W～100W嘅就無錯嘞。
買快速充電器，除咗要留意W 數，我哋最好選購最新嘅氮化鎵(GaN)充電器，氮化鎵(GaN)喺第三代半導體材料，近期技術成熟並應用喺日常生活嘅充電器上，佢係一種高功率、散熱佳、喺高溫下都可以維持充電效能穩定嘅技術，更重要嘅係這項技術可將充電器體積做得更細同輸出功率更高。
氮化鎵(GaN)充電器嘅特色：
•1個氮化鎵(GaN)充電器就可以同時為手提電腦、平板、手機、手錶等3C產品充電。
•可以提供100W甚至係更高嘅充電功率，快速充電以減少充電時間。
•快速充電時不容易發熱、發燙。
•相較於傳統充電器，重量更輕、體積更小。
我哋買充電器都會㨂有兩個以上連接埠嘅充電器，但要注意嘅係多個連接埠有其限制存在，例如每個埠嘅最大充電功率不同，並非每個埠都支援快充，而且同時使用多個裝置充電時，個別嘅充電效率通常會降低。舉例來說，某款GaN充電器共有2個連接埠，其中1個埠支援PD快充協定，可以提供65W嘅快充功率，另外一個則僅能支援普通嘅15W充電功率。喺單單使用1個裝置充電時，充電器可以確實達成最高65W嘅充電功率，不過喺同時替2個裝置充電嗰陣，PD快充嘅功率就會剩下45W，而唔係完整嘅65W功率。
大家有無經歷過，買咗部有快充功能嘅手機，又買咗個有大 W數嘅充電器，但充極都係好慢，問題出喺邊呢？
首先，你要確保充電器係有快充連接埠（即係寫上PD或QC 嘅字樣），其次就係要買啱一條可對應快充嘅充電線。
如果我哋將電流睇做水，充電器相當於帶有過濾功能嘅水缸，充電線則相當於水管，水缸雖然夠大，但管太窄嘅話，出水都會好慢。
咁點樣挑選快充充電線呢？
太深嘅電流概念就唔多講嘞，只要我哋記低一啲原則就可以：
1. 確認充電線包裝上有標示支援快充技術
2. 確認充電線嘅最大電流標示 ，一般micro USB線只要支援高於2.4A 嘅電流，就可以稱為快充線，如果係USB-C線嘅話，則要支援 3A 或 5A 先屬於快充線。
3.充電線愈長，阻力會愈大，充電速度就會更慢，建議喺挑選充電線嘅長度儘量喺2米以內，先唔會影響充電嘅品質。除咗長短，線芯嘅粗幼同樣影響傳電。
4. 充電線大多使用一般脆弱易斷嘅橡膠材質，用得耐容易老化，線材外露，接頭斷裂會產生接觸不良，當充電線材有破損嘅話，建議盡快更換，避免造成手機電池損壞，所以，選擇一啲尼龍或金屬編織線會耐用一啲。
5. 充電線接頭設計，常見的快充線接頭都係塑膠材質，亦係較容易裂開，長期下來自然影響快充效率。建議在挑選快充線，選擇金屬外殼或加固接頭設計，如果需要時常邊充電邊用手機，也可以考慮使用彎頭快充線，減少拗折充電線嘅機會。
6. 充電線線芯用乜嘢材質都有影響，就導電性而言，大家可以參考金屬導電率的排名，銀 >銅 >鋁 >鐵 >鋅 >錫。一般較好嘅線會採用鍍錫銅、裸銅，其中鍍錫銅更為普遍，導電性能略不及裸銅，但更耐用。更頂級嘅充電線可能會採用鍍銀銅。較為普通嘅線線通常會採用鋁鎂絲、漆包線、銅箔絲等。再差一啲嘅線，就可能會採用鐵芯渡銅、鐵芯鍍鋅、鐵芯、鋼包鋼、鋼包鐵等。
7. 如果係買iPhone用嘅充電線，咁就盡量買有原廠認證MFI，會較可靠。
綜合上面講嘅充電線選擇，並唔係買愈貴嘅就一定愈好，而出名嘅牌子都會有唔同嘅線材選擇，如果你唔係要一條傳輸快嘅數據線，就唔需要揀最頂級嘅，只要佢可以快充就得。喺配件舖中可以挑選嘅線至少有幾十款，亦唔係平嘢無好，只要用上面嘅選線原則就一定揀到平靚正嘅快充線。
Tech實你 充電器 充電線 快充 QC快充 USB-PD快充
