智慧家居 AI監察用電

美國有間科創公司Sense專門以 AI 人工智能為核心，設計智慧家電管理裝置，而佢哋最新嘅發明可以監察家庭電器嘅耗電數據，再用人工智能管理用電量。Sense係用手機去操作，操作介面一睇就明，用起嚟都相當輕鬆。咁睇下佢係唔係真係做到節能嘞。

Sense嘅AI有自我學習功能，佢主要透過AI學習技術嚟監察成間屋各個電器嘅用電量，甚至可以偵測到每個電器嘅開關狀態、用電數據，而估算出電費同用電嘅碳排量。

亦因為 AI 啱開始需要「學習」用戶嘅用電模式，要喺頭一個月累積相關數據，先可以開始定制出你屋企嘅用電計劃。Sense 嘅介面設計的確好user friendly，顧及到一般用戶要睇嘅唔係一堆堆數字，而係關於用電量嘅建議，所以 App 嘅設計做到好親民，例如佢用大大小小不同嘅波波，去顯示屋企各種電器嘅用電狀況，波波愈大就代表用電愈多。

Sense 仲可以俾用家檢視電器、照明同其他裝置嘅使用量，AI又會推薦降低使用量嘅方法，佢嘅附加功能仲可以強大到檢查到電器嘅使用狀況，有無問題要維修。

Sense除咗可以即時睇到用電紀錄，仲可以追蹤家庭嘅碳使用情況，並提供碳排量嘅預測趨勢圖，推薦邊個時間可以進行高耗電任務，例如喺碳排放量最低嘅時候洗衫、洗碗或者充電動車。

識得睇能源標籤買電器可以慳好多電

買電器時記得睇下個能源標籤，咁先可以慳到好多電，睇下個表就明白，如買一級能源嘅冷氣機，最多可以慳到六成電呢。

用一級能源標籤電器可以慳幾多電 （資料來源：中華電力CLP）

夏天長開冷氣係咪真係慳唔到電？教你幾招慳電法

夏天最食電嘅一定係開冷氣，其實識得用都可以慳到電，當然，如果你喺夏天冚住棉胎都要開大冷氣瞓嘅人，以下小編俾嘅開冷氣貼士就唔係幾啱你參考嘞。

1.出門一陣間就熄冷氣唔一定最慳電

好多人出門買啲嘢就返屋企，都會先熄冷氣，以為咁會慳啲電，其實唔一定嘅。

因為冷氣開始運作時，需要500W～1000W嘅耗功率，而等室溫同冷氣設定溫度一致時，又要耗費100W左右。如果你只係出去十幾分鐘，最好繼續保持冷氣運作，咁至慳電。如果再想慳電啲，建議出去嘅時候可以將冷氣溫度調高1℃就更好。

 2.冷氣溫度調得越低越涼？

氣溫只係人體感知冷熱嘅其中一個條件，濕度、氣流、輻射都會改變體感溫度，所以一味地將冷氣機溫度調低，唔係最有效嘅方法。人體喺吹風時，體感溫度約會下降2℃左右，所以調低冷氣溫度，不如將冷氣風量校大，等肌膚吹住冷風，有效降低體感溫度。如果配埋部電風扇，提升冷氣循環，咁就更慳電同涼爽。

3.自動模式比細風模式更慳電

吹冷氣時，咪以為校細風係慳電，其實仲耗電。因為開著冷氣後到室內夠涼爽時，呢個過程係最為耗電，等到室溫同設定溫度相同後，耗電量先會慢慢降低。所以調成微風模式嘅話，都唔知要等幾耐至夠涼，喺降溫期間製冷系統就不斷扯電。如果用自動模式，系統則會跟住房間狀況，選擇最為適當嘅風量同風向，等房間涼爽之後，會自動控制耗電量，去保持設定溫度。

4.用冷氣機嘅乾燥模式慳到電嗎？

潮濕天，我哋都知冷氣機有除濕功能，但冷氣模式嘅除濕效果比乾燥模式差，且冷氣模式會同時令溫度下降，耗費多餘電力，反而乾燥模式會盡量維持一致溫度，同時發揮優良除濕功能。但要提醒大家，冷氣除濕效果雖然好，但亦比抽濕機更耗電，所以，單係想除濕都係用抽濕機啦。

5.最健康嘅冷氣溫度

其實身體有適應溫度嘅能力，開冷氣如果想慳電又健康，都係遵循醫生意見，例如室內外溫差最好在5至6℃之間，例如室外氣溫32℃，則冷氣溫度則要調校到26至28℃。人體能夠適應與外界相差5至6℃嘅溫差，若差距過大，則會造成身體好大負擔，容易致病。