01
《湯瑪士迷你小火車》（適合3歲以上）
湯瑪士小火車係人氣極高嘅英國兒童電視節目，湯瑪士小火車出嘅手機Game好玩度甚高，可以俾小朋友自己創作出專屬於小火車，再走到各地去遊行、探險，穿越美麗又帶有危機嘅仙境、或者陰森怪異幽靈森林，最有趣嘅係透過AR擴增實景，喺現實環境呈現自己嘅創作。
遊戲畫質極高，就連大人都可能沉醉其中，所以，要好好控制子女玩嘅時間。另外，遊戲本身雖免費，但有啲地圖關卡同車型係要課金嘅，家長就要注意唔好俾子女亂咁俾錢。
02
《Bimi Boo第一個詞彙》（適合2歲以上）
呢個免費嘅識字手遊，一啲都唔簡單，除咗你嘅BB通過同識字卡片嘅互動來學習人生中第一個單詞，又可以學習分類和排序，開發認知能力。
佢最勁嘅係寶寶識字卡支持17種多國語言：英語、西班牙語、法語、德語、義大利語、俄語、葡萄牙語、土耳其語、希臘語、荷蘭語、丹麥等，同BB學習下其他語言原來都好多Fun，或者你會發現佢係語言天才呢。不過，17種語言其中只有普通話但無廣東話。咁又無乜所謂嘅，爸爸媽媽自己親身教BB講囉。
遊戲有12個唔同嘅主題，真係有排玩同有排學㗎。而遊戲雖然要俾幾十蚊先可以解鎖所有主題，但玩落唔會加插任何廣告又真係幾好。
03
《 Crossy Road天天過馬路》（適合3歲以上）
Crossy Road係如此一個古早又簡單嘅手遊，帶領50幾種好可愛嘅動物，驚險地穿過各種奇妙場景嘅馬路，極有不斷拉緊神經嘅刺激感，然後喺多種爆笑陣亡方式中瞬間釋放玩家壓力。小朋友都有自己嘅功課壓力，如果每天同佢玩10分鐘，歡樂輕鬆一下，又可以練下反應神經。
Crossy Road喺遊戲中不斷送玩家各式各樣嘅獎賞，就算陣亡都有禮物送。累積咗金幣，可以去扭蛋機中抽新寵物，可以等玩家慢慢收集50 幾種寵物蛋。有咗奬賞，更令小孩玩出成功感呢。
04
《Minecraft》（適合5歲以上）
Minecraft可以講係最好玩亦最流行嘅手機「沙盤游戲」。游戲無指定的玩法，玩家可以依照個人喜好及想法，自由地探索以方塊建成嘅開放世界。Minecraft有多種遊戲模式，例如生存模式、創造模式同冒險模式等。而Minecraft世界中好多嘢都係模仿真實世界。小朋友透過遊戲可以認識到好多專業學科同技術，包括科技、工程、設計、數學、物理、資源管理、冶煉同農學等， 正正就係現今教育所強調嘅STEAM：科學（Science）、技術（Technology）、工程（Engineering）、藝術（Arts）同數學（Mathematics）五個核心思維。
Minecraft仲可以培養學生喺未來社會需要具備嘅軟技能，如邏輯思維 （Logical Thinking），創造力（Creativity），解難能力（Problem-Solving Skill）同協作能力（Collaboration Skill）等。
喺Minecraft嘅3D立體世界，小朋友更可以提升視覺空間能力。需要掌握移動方式，有助建立前後左右上下嘅方向感。操控遊戲都可以訓練手眼協調性。
Minecraft更推出咗教育版，所以，Minecraft唔單止係一個遊戲，更可以帶來數之不盡嘅學習機會，對小朋友嚟講，係一個不可錯過嘅教育工具！
05
《紀念碑谷》（適合5歲以上）
《紀念碑谷》呢款遊戲証明遊戲也可以成為藝術品，畫風唯美、具有藝術感、好考驗玩家耐性，已經係兒童手遊排行榜嘅人氣之作。
遊戲通過探索隱藏小路、發現視力錯覺，擊敗神秘烏鴉人，去幫助沉默公主艾達走出紀念碑迷陣。遊戲一共有18關，而且加入咗AR技術功能，將神奇嘅3D迷宮世界，展現喺現實環境入面。
小朋友玩嘅時候，看似無路可走，憑住思考搵出新嘅道路，對於訓練小朋友嘅解謎能力同遇難冷靜思考嘅態度，好有幫助。呢個遊戲唔單止可以培養出立體觸覺、解決困難同唔會中途放棄嘅毅力，仲可以培養小朋友對美感同藝術嘅眼光同追求添。
不過，無論遊戲點好玩，家長們都要留意限制小朋友嘅「電子奶咀」時間，多啲陪佢地，建立良好嘅親子關係。
Tech實你 手機遊戲 電子奶咀 學習 益智
