一) 新科技廚具推介：

連大師級廚師都樂用：慢煮棒

慢煮棒係今日第一流嘅西廚都會用嚟烹調健康肉扒嘅新型廚具。

慢煮棒嘅整個機身好似網球拍柄咁，用喺納米式嘅廚房一啲都唔阻地方，更可以恆定低溫(約攝氏30-60度）喺真空環境下烹煮食物。佢主要用於烹煮肉類(尤其有足夠厚度嘅靚牛扒、羊架等)，亦有人用嚟整糖心蛋，只要將已醃好嘅生肉放入真空袋，慢煮約40-60分鐘(視乎肉嘅大細同數量)，打開即可以食。呢種方法煮出嚟嘅肉唔止鮮嫩多汁，仲零油煙添。

而家大部分慢煮棒都可以接駁至手機，或預先設定開機時間，大家可以放工前開定機，返到屋企開埋支酒就食得啦！

一個高科技鍋做曬所有嘢：智慧萬用鍋

飛利浦嘅快速洩壓智慧萬用鍋主打「快速洩壓科技」，做到免浸泡、免解凍、免睇火三大功能，不但令到下廚時間大大縮短，更可以一鍋做曬大部分烹調工序。免浸泡係指利用智能控溫控壓裝置，將豆類等乾貨直接用高溫高壓軟化食材結構，做到唔駛浸就直接煮得；免解凍就係利用5層高導熱內鍋同埋智能控壓控溫裝置，將食材均勻加熱，直接煮食；唔駛睇火係因為28種風味智能程式都係全自動，一閂個蓋按掣就可以完全唔駛理。做到哂蒸、煮、燉、滷、煎、烤、炒，非常方便。

氣炸鍋升級版：空氣炸鍋

LazySusan 空氣炸鍋有五種功能，包括氣炸、烘烤、燒烤、烘焙、乾燥五合一，佢採用全自動旋轉、仲有烤叉及燒烤組等齊全配件，炸物、烤全雞、蛋糕都全部做到；據講可以健康減油達80%添！

「一爐永逸」：智能電陶爐 (火鍋、燒肉、炒餸、煲湯......)

部分納米樓廚房只有一個爐頭，非常唔方便，想有多個大家可以考慮電陶爐。大家都係無火煮食，電陶爐比電池爐優勝在於不論器皿嘅材質都可加熱，其熱力仲會均勻咁直接傳導去器皿，智能恆溫，打破傳統氣體爐熱能向四周擴散嘅缺點，唔會令室內變熱。而且大部分嘅電陶爐有安全設計，當燒乾水時會自動切斷電源。 如果配返合適食具，燒肉、炒餸、煲湯、打邊爐全部做到！

家居種菜不是夢：Harvest with Gourmet Herb Seed Pod Kit

而家通脹咁勁，菜價上升，好多人都想自己種菜，但除住村屋，普通屋企又點種到菜呢？其實，只要識得用新科技，住納米樓都可以實現食自家菜嘅夢想。AeroGarden™ Harvest with Gourmet Herb Seed Pod Kit，利用20W LED 燈製造合適植物生存嘅環境，只需要加入水及plant food並插電，就可以同時種到6種香料、花或菜，唔駛泥土，仲種到一年左右添，咁就長食長有啦！

二) 強效辟味小秘技：

所有Open Kitchen最忌就係殘留煮食氣味，好多人又要用空氣清新機，又要噴大量清新噴霧，有啲人仲誤以為用香薰可以辟味添。

其實，辟味好簡單，依照以下嘅小秘技，包你除曬所有廚房味：

1) 檸檬

只要將檸檬切開兩半，放入水入面開蓋煲10分鐘，有檸檬香味嘅水蒸氣就會清走煮食異味。唔想次次都用檸檬，可考慮其他香料或柑橘類水果。

2) 梳打粉或咖啡粉

梳打粉可以話係家居必備嘅好幫手，除咗可以去積，仲可以除臭! 只要放一碗梳打粉或已煮嘅咖啡粉喺廚房一晚，佢就會幫你吸走空間嘅異味。

3) 白醋水

只要將白醋加水倒入噴壺就可以自製空氣清新劑，噴落去廚具及牆壁等可能有油煙嘅地方。稀釋後的白醋水唔止辟味，仲可以殺菌添。

4) 清洗鋅盤及去水口

呢點睇落好簡單，但係好多人都忽視咗。鋅盤好多時會積咗萬年積，又或者油脂等積住喺去水口，就會產生異味，大家不妨用1:20嘅梳打粉水定期清潔鋅盤及去水口啦。