長期歎冷氣，好容易有「冷氣病」！冷氣病，又稱為「空調綜合症」，係指一個人長時間喺冷氣環境下活動，而產生一系列不適徵狀，例如頭暈頭痛、出現鼻敏感或感冒症狀、周身骨痛、關節痛、手腳冰冷、易倦乏力、工作沒精打采等。
現代醫學認為出現冷氣病嘅最大原因，係因為冷氣機內嘅微生物滋生，加上中央冷氣系統唔能夠保證空氣對流，容易令病菌積存喺空間內並不斷散播，加速病原體散播。亦有人認為室內同室外溫差大，令人體無法適應，先係致病成因。
要對抗冷氣病，專家有幾招醒大家！
- 分段進出室內外：先喺室內逗留 3 至 5 分鐘，再走到室外陰涼處待幾分鐘，再返入室內，反復做 2 至 3 次，等身體適應室內低溫
- 控制溫差和濕度：室內濕度保持喺 60% 左右，室內外溫差唔好超過3至5℃，室內溫度最好喺 25至26℃之間
- 多喝溫水：經常留喺冷氣房，水分容易流失，造成鼻腔同黏膜過乾，甚至引發支氣管炎，所以要多補充水分
- 進行保濕工作：冷氣容易令皮膚變乾變皺，專家建議沖涼後搽乳液，等水份保留喺皮膚底下，或者喺身邊放一杯水或種植物，增加環境濕度
- 給眼睛一點溫暖：眼睛乾澀係常見嘅「冷氣病」，可以適度滴眼藥水，或者用暖毛巾敷眼，以紓緩症狀，多補充維他命A都可以能改善眼乾等不適
- 保持放鬆：傳統中醫認為溫度同人嘅情緒有關，所以溫度轉換時，情緒亦會跟住波動，所以要養成調息嘅習慣
夏天到，好多人都鍾意返屋企即刻開冷氣歎世界，清涼冷風的確令人心曠神怡，不過日本冷氣公司大金工業年前發表一項調查報告，指出一般冷氣機大多都冇換氣功能！
所謂「換氣」，就係用新鮮嘅室外空氣代替室內空氣，以稀釋同置換建築物內對人體有害嘅空氣污染物。點解換氣咁重要？因為喺完全封閉嘅房間裡面，空氣無法輕易離開，導致空氣污染物滯留喺室內，會影響房間中人們嘅健康。
好多人都誤解冷氣機會由屋外帶進空氣，可以用呢些空氣為房間換氣，但實際上，喺大多數情況下，冷氣機係無法進行通風。家用冷氣機只會喺房間內部吸入空氣，然後進行冷卻或加熱，然後將空氣帶返房間，室內空氣係唔能夠被新鮮嘅室外空氣代替。
點樣可以幫屋企換氣呢？大金有簡易換氣教學醒大家，就係打開窗戶，每個鐘開窗 5 至 10 分鐘，就可以做到通風效果。如果屋企有對流窗，可以同時打開造成通風效果。如果冇對流窗，可以打開房門，然後喺窗附近放一部風扇，將風扇轉向窗戶，等空氣進入房間。
至於開住冷氣換氣嘅方法亦大同小異。如果夏天喺外面返到屋企，可以喺開冷氣前，利用室內嘅熱空氣通風，嚟幫房間降溫。外面嘅空氣進入室內，會令房間嘅溫度會稍為上升，大金建議可以校低少少冷氣溫度，以防中暑。
另外，如果要喺開冷氣時通風，大金建議開離冷氣最遠嘅窗，因為如果冷氣直接吸入由外部進入嘅熱空氣，有機會令冷氣過載，電費會增加。此外，揀離冷氣最遠嘅窗，亦可以防止熱空氣被快速冷卻時，喺冷氣嘅空氣出口上形成結露。
資料來源：DAIKIN
而如果想更有效地幫家居換氣，又可以點樣做呢？可以考慮安裝全熱交換機。香港居住環境狹窄，能夠有對流窗通風，或者長時間打開窗戶，保持空氣流通嘅機會唔多，新鮮空氣無法流室內，令室內積存有害空氣污染物。
傳統嘅通風設備，空氣清新機只能將空氣中嘅污染物質隔走，無法保持空氣流通；抽氣扇亦只係將室內空氣排出，未能為室內提供新風；而冷氣機亦正如之前所講，只係室內空氣內循環，無法排氣同換氣。相比起呢啲傳統通風設備，全熱交換器集通風、過濾、調溫功能於一身，機身唔大，亦節省空間。
而全熱交換機嘅功效，就係能夠喺 24 小時唔開窗嘅情況下，都可以引進室外新鮮空氣兼進行淨化，確保入屋嘅鮮風乾淨無害，又可以將室內混濁空氣淨化排出，達致室内外空氣交換同淨化，降低二氧化碳濃度。而當全熱交換機配合冷、暖氣使用時，仲可以將 80% 以上嘅冷、暖氣保留喺室內。全熱交換機仲有另一個好處，就係能源消耗極低，即使每日使用 12 個鐘，每日運行成本都唔多於 $1 ，大幅減輕冷氣負荷之餘，仲可以解決通風問題。
既然全熱交換機咁好用，點解香港唔流行？呢個問題確係值得大家探討下。
Tech實你 冷氣機 換氣 全熱交換機 冷氣病
