3分鐘學識點玩Reels

其實有鏡頭嘅手機就拍到片，點解仲要用Reels呢？因為佢音效加工夠方便，操作好簡單，保證你3分鐘就學識！而家拎起部手機，再開埋Facebook，跟住以下嘅步驟做啦：

1. 入咗Facebook後，你會見到左邊有「Reels」掣，如果你想睇其他人嘅短片，就要撳下一行嘅「Reels」掣，但同碌Stories唔同，睇Reels係上下滑動而唔係左右。

2. 執行Reels後，右邊有一列工具，分別係Audio、Length、Speed、Effects、Timer、Green Screen，底部就係錄影掣，如果有突發嘢，你想拍咗先然後再加效果，直接撳紅色圓點即刻拍到片，預設長度係30秒。

3. 如果你已經諗好點拍，或者想為現成嘅短片加效果，可以揀Audio，喺Facebook音樂庫揀歌，或者用手機入面嘅聲音檔。值得一提係有廣東歌㗎，你可以輸入歌星名去搜索。

4. 揀好背景音樂就可以揀畫面特效，實在太多選擇，小編唔全部列出啦，同埋有兩種操作方法，一係左右滑動效果圖示，或者點擊「More Effects」一次過睇到更多特效。另外，同一條片，你可以加唔同特效，或者刪除某一個特效然後再加其他特效，唔駛一個特效拍一段片㗎，試到滿意先撳save。

5. 如果你唔想人見到個背景，就可以揀Green Screen，程式會識得勾番你個人出嚟，效果就如下圖。小編試過，人臉係好易辨識，就算只係相片，都係等幾秒就睇到，但如果係動物就要等一段時間，有可能勾唔到出嚟。

6. 做好背景音樂、特效同退地效果後，撳Next加入文字同埋表情圖案，或者剪走唔想保留嘅片段。雖然Reels有好多隻字體，但同特效唔同，一段片只能夠用一款字體，就算你換行都冇用，不過你可以將文字放喺畫面任何位置。

7. 其他功能仲有Speed，即係加快或減慢影片速度，用嚟製作快速搜畫式或慢動作的畫面；Timer就係倒數字計，方便用戶用腳架等放置手機時錄Reels。

8. 有時你睇人哋嘅Reels，會見到Remix this reel選項，呢個係俾你玩接龍或者比較片段，例如你覺得自己跳舞好似教主咁型，就可以將教主片段放左面，然後右邊就拍自己嘅跳舞動作，最後夾埋做一條片。

9. 至於Instagram嘅Reels，玩法同Facebook嘅Reels一樣，但佢多咗Layout及Align功能。Layout將鏡頭畫面分成2至6份，換言之同一時間內，最多可以出現6格唔同嘅畫面，用番上面教主跳舞做例子，你可以加多幾個朋友嘅片段，睇吓邊個模仿得似啲。

10. Align將上一個片段嘅物件同下一個片段對齊，方便用家喺同一個位置拍出有趣嘅過場，例如原地跳起但變咗場景、同一個人但件衫唔同咗等等。

以上就係Reels嘅基本操作，係咪好容易呢？基本上用以上功能已經可以輕易而舉整到一條片。當然你要有電影級嘅效果、畫質、收音等等，Reels就比唔上手機嘅拍片功能，但呢類短片得15秒至一分鐘已經可以表達好簡單嘅內容，例如今日貓貓嘅睡姿好得意、自己今日60秒內做到100下掌上壓之類，都唔使太高畫質或者場景效果。

點樣用Reels賺錢

Meta推出Facebook版本嘅Reels後，曾經講過將10億美元，分俾創作者當做獎金，只要符合條件，就可以每個月拎到最高35,000美元嘅獎金。Meta話分紅作用，係試驗邊類型嘅內容喺Facebook比較受歡迎，除咗美國，分紅會喺未來幾個月，擴展到其他國家或者地區。呢筆錢美其名係鼓勵創作，但明眼人都知，係用嚟挖走抖音嘅玩家。

 創作人另一筆收入就係俾Meta喺條片投放廣告，有兩種格式：橫幅廣告以半透明形式出現喺短片嘅底部，靜態廣告就由創作者決定放喺短片任何位置，將來仲會有全螢幕同沈浸式廣告。而根據《TechCrunch》嘅報導，55%廣告費俾創作人，45%俾Facebook，未來仲可能隨住測試而有所改變。最後一種收入就類似而家Youtube嘅打賞，但名稱叫做「Stars」，等粉絲可以直接打賞俾創作人。

Reels同抖音有乜唔同

總結：正所謂「if you can't beat them, join them」，Reels憑住極似抖音嘅抖音，相信可以搶走一部分抖音玩家，如果你都想靠拍片賺吓收入，就要趁而家儲定粉絲，等分紅計劃擴至到香港，你就可以分一杯羹啦。