1. Offscreen - 幫你少啲玩手機

日日手機唔離手，喺屋企冇王管就仲大鑊，工作效率大大下降。「Offscreen」可以限制每日屏幕使用時間，當就嚟用晒手機時間，佢就會提醒你要休息一吓。呢個 App 仲會記錄用家嘅手機使用時間，甚至拎起手機嘅次數、平均查看時間、鎖屏時間同每日螢幕使用時間等，等你減少用手機嘅時間，工作自然專注啲！

2. Forest 專注森林 - 同事齊心種樹

工作時間去種樹？呢個 App「Forest 專注森林」喺當你開始專心工作果陣，畀你自行設定一個時間，例如半個鐘或者一個鐘，之後㩒開始，棵樹就會慢慢長大，期間用家唔可以用其他應用程式 (但可以接電話) ，如果用家中途離開咗，種緊果棵樹就會枯死。另一個特別之處係可以幾個同事一齊種樹互相督促認真工作，老闆見到一定畀 like。

3. Be Focused - 提升專注力

每日排山倒海嘅工作量點應付？「Be Focused」 係一個結合 To-Do 清單同倒數計時器功能嘅專注 App ，用法簡單，先設定好要完成嘅事項，開始工作時就按下倒數計時器，實現提升工作效率的結果。直正做到「工作時工作，休息時休息」，仲可以清楚睇到自己工作同休息嘅時間分布和比例，休息之後再投入工作，輕鬆工作提升專注力，轉頭又收工。

4. Noted - 開會紀錄神器

WFH開始，一定會有一連串嘅線上會議，呢個時候開會紀錄神器 「Noted」 就幫到你，佢可以同步錄音、筆記，都可以將錄音轉為逐字稿，有佢就唔會甩漏開會重點，同埋要向上司交代嘅事項。

5. Flat Tomato - 番茄工作法

WFH工作最忌心散，集中力不足，見到「Flat Tomato」靚靚嘅番茄版面，即刻幻想到自己變身一個廚師，佢仿效廚房用嘅定時器，以倒數嘅形式為你規劃工作時間同小休時間，畀你好好規劃一日嘅行程、任務管理同資料系統。

小編Forest 試後感：

WFH的確好難專心，小編日日對住部電腦寫稿，除咗食飯，對手幾乎冇離開過keyboard，最慘係成日分心，加長工時。想工作專心一啲？小編試玩過「Forest -專注森林」，試過棵樹種到枯死 (好彩係假樹)，心得就係 10分鐘最容易能夠專注到，日日同同事一齊玩「種樹」，工作效率出奇地好，老闆都讚好！