老友話，老牌家族賣樓，樓市堪虞，我問堪虞點解，老友話，即是好大鑊。

其實，老牌家族唔賣樓，樓市才堪虞，嚴格來說，老牌家族阻住地球轉，因為老牌家族所持有的物業，大多數是舊樓，但是他們又唔賣，又唔發展，只是收雞碎咁多租，就算肯賣，大哥得，細佬又唔肯，轉眼又過一年，連跟進的物業代理亦轉行，買賣仍然未有眉目，現在老牌家族肯賣樓，重建之後，或多或少都會增加供應，所以，老牌家族賣樓是不是好消息？

不懂樓市的人才會話，老牌家族賣樓，樓市大鑊了，老實說，老牌家族的後人，學術水平很高，有博士學位的多過冇博士學位的，但係唔識做生意，不過，又唔憂柴憂米，都唔知要等到幾時，家族後人才會聯合起來，的起心肝賣樓。

經常都有傳言話，老牌家族賣樓，但到最後都唔會成事，唔知道那些話樓市堪虞的評論員會不會話，老牌家族唔賣樓，樓市前景亮麗，我估計都唔會，他們會話，老牌家族想賣樓都冇人承接，樓市前景堪虞。

作者為紀惠集團行政總裁湯文亮