雖然有報章不時話悲情，但事實上樓市的成交價與成交量都有不俗表現，尤其是在復活節清明節假期期間，不少成交都是零議價，大家以為零議價業主一定很開心，其實並不一定，或者買家比業主更加開心。

假期間有老友請飲茶，在場還有幾位朋友，老友話最近賣走了一個住宅單位，買家零議價，非常開心，所以請大家飲茶，我飲得老友餐茶，就一定唔會講不利消息，除了恭喜之外都是恭喜。但有另外一個老友話點解要開心，零議價代表買家仲有能力俾多少少，即使多2至3個百分點，最少都有幾十萬元，食十頭鮑都可以，何止一餐茶。不過，賣仔莫摸頭，賣咗就算啦，話說咗出嚟，場面立刻變得非常尷尬。

筆者記得少時候，阿媽叫我去買一塊不見天豬肉煲湯，豬肉佬話幾多錢，我就俾幾多。幾次之後，豬肉佬同我講，「哥仔，唔該還下價」，否則佢唔開心，自此之後，我減價，佢又加返些少，最後雙方都開心，連我阿媽都話我醒目，十歲唔夠就識得講價。

有老友賣一個物業，買家還價減一成，價錢本來都可以，他問我意見，我話千祈唔好，業主減一成都肯賣，買家反而會縮沙，或者要求減更多價，不如還價減半成，令到買家認為這是業主底價。其實，每一個買家最大心願，並不是以低價買到，而是可以用業主底價買到，這就是討價還價，很高深學問，高深之處就是令買賣雙方都開心。

作者為紀惠集團行政總裁湯文亮